Afrikaans Tweede Addisionele Taal — Vraestel 1

MENEER REGRUK

'n Onderwyser duisend!

1   Riyaadh Najaar (68) het in die Strand naby Kaapstad grootgeword. Hy is die oudste van vier kinders. Almal het hom Boeta genoem.

2   Riyaadh se pa was 'n godsdiensleier (religious leader) en sy ma was 'n onderwyseres. Hy sê die grootste lesse wat hy by sy ouers geleer het, was om altyd eerlik te wees en dinge reg te doen.

3   Riyaadh was 'n leerder aan Hoërskool Harold Cressy in Distrik Ses. Victor Richie, wat sy skoolhoof was, was 'n baie goeie onderwyser. Hý het Riyaadh laat besluit om ook 'n onderwyser te word.

4   Na matriek het Riyaadh onderwys aan die Hewat Onderwyskollege in Athlone gaan studeer. Sy vakke was Geskiedenis, Geografie, Engels Huistaal en Afrikaans Addisionele Taal. Sy eerste onderwyspos was in 1976 by Hoërskool Peninsula Suid. Dit was die begin van 'n baie suksesvolle onderwysloopbaan (teaching career).

5   In 1984 is Riyaadh na Hoërskool Spine Road oorgeplaas. Hy het diep spore by hierdie skool getrap. In 1993 het hy hoof geword en daar gebly totdat hy in 2018 afgetree het (retired). In sy 25 jaar as hoof van Spine Road het dit een van die gebied se topskole geword.

6   Riyaadh was 'n uitstekende hoof. Hy glo 'n skool se onderwysers is die sleutel tot 'n skool se sukses. Dit is húlle wat die kinders reg moet lei en in hulleself moet laat glo. Hy het almal op sy personeel (staff) geken, selfs die skoonmakers. Hy het sommer onverwags by klaskamers ingestap om te sien wat daar aangaan. Hy was ook streng op uniform. Hy glo alles wat gedoen word, moet tot voordeel van die kinders wees.

7   Na sy aftrede in 2018 het Riyaadh gedink dat hy klaar was met die onderwys. Hy wou net rus, tyd saam met sy familie deurbring en sy stokperdjies beoefen. Riyaadh en sy vrou, Rochan, is al 35 jaar getroud. Hulle het ses kinders en 8 kleinkinders. Twee van sy kinders woon oorsee. Riyaadh stap graag, speel domino's en het ook wedvlugduiwe (racing pigeons).

8   Die Onderwysdepartement het egter ander planne met Riyaadh gehad. Omdat hy so 'n suksesvolle hoof was, het hulle hom gevra om skole wat swak presteer, te gaan régruk. Vandaar die naam Meneer Regruk!

9   Hoërskool Windsor was die eerste skool waar Riyaadh dinge gaan regruk het. Dié skool het hulle hoof verloor en Riyaadh het gaan help om hulle matriekuitslae te verbeter. Daarna was hy ook by Hoërskool Princeton, Livingstone en toe Alexander Sinton. Riyaadh is 'n rustige mens, maar as dinge nie reg is nie, stel hy dit reg. Terwyl hy by Sinton was, het hy die matrieks se skooldag verleng en ook Saterdagklasse ingestel. Die skool se uitslae hét verbeter.

10   Is hy reg om nóg 'n skool te gaan regruk? "Nee," antwoord Riyaadh. "Alexander Sinton was my laaste. Ek sal altyd bereid wees om raad te gee, maar ek wil nie weer in 'n formele pos as skoolhoof wees nie."

11   Riyaadh se vrou, 'n onderwyseres, was altyd sy steunpilaar. Sy het hom in alles ondersteun (support). Nou kom sy familie — en sy stokperdjies — eerste!

[Verwerk uit Huisgenoot, 18 Februarie 2023]

FIFA WÊRELDBEKER 2026

Ons is 26!

1   FIFA organiseer wêreldsokker. Hulle maak die reëls. Die FIFA Wêreldbeker-sokkertoernooi (FIFA World Cup Tournament) is die grootste sportgebeurtenis (sports event) in die wêreld. Miljoene mense kyk op televisie daarna. Dis waar legendes soos Messi, Ronaldo, Torres, Klose en ander wys hoe goed hulle is.

2   Die FIFA Wêreldbeker-sokkertoernooi word elke vier jaar gespeel. Die toernooi is vir die eerste keer in 1930 in Uruguay gehou. Die toernooi is nie tussen 1942 en 1946 gespeel nie, want daar was oorlog.

3   Daar was al 22 toernooie. Net die beste internasionale mansspanne neem hieraan deel. Op die oomblik is Argentinië die kampioen (champion). Hulle het die 2022-toernooi in Katar gewen.

4   Die volgende toernooi is in 2026. Partykeer verander FIFA hulle reëls en program. 'n Paar dinge van die 2026-toernooi gaan anders as altyd wees.

5   Vir elke toernooi word daar 'n gasheerland (host country) gekies waar die toernooi plaasvind. Die 2026-toernooi gaan in Kanada, Meksiko én die Verenigde State wees.

6   Gasheerlande moet genoeg stadions hê met plek vir baie mense. Daar moet ook genoeg vervoer vir besoekers wees om te kom waar hulle wil wees. Die stadions se gewone name is vir die 2026-toernooi verander. Die stadion sal dieselfde naam hê as die stad waar dit is, bv. die Mercedes Benz Stadion word die Atlanta Stadion.

7   Die 104 wedstryde sal oor 39 dae in verskillende stadions gespeel word. Dit begin op 11 Junie 2026 in Meksikostad. Die finale wedstryd sal op 19 Julie 2026 in New Jersey gespeel word.

8   Die 2026-toernooi gaan gróót wees. Daar is gewoonlik 32 spanne wat speel. In 2026 gaan daar 48 spanne wees. Die spanne sal in 12 groepe van vier elk verdeel word. Die span wat op die oomblik die kampioen is, het klaar 'n plek in die toernooi. Die gasheerlande se spanne ook. Ander spanne moet oor 'n periode van twee jaar vir die toernooi kwalifiseer.

9   Elke toernooi het sy eie gelukbringer (mascot). Willie was die eerste gelukbringer. In 2026 is dit Speed. Hy is 'n strokieskarakter (cartoon character) wat soos 'n naelloper (speedster) lyk. Hy is blou en geel van kleur en vol energie!

10   Elke toernooi het ook 'n eie temalied (theme song). Die amptelike temalied vir 2026 is op 17 Mei 2023 vrygestel (released). Bekende musikante van die stede waar wedstryde gespeel gaan word, sal die temalied sing. Daar sal oral lekker kuierplekke (fan zones) wees waar mense bymekaar kan kom en die sokker op groot skerms geniet!

11   Adidas maak die 2026-bal. Die bal se naam is Trionda. Dit is wit, met dele in swart en geel. Daar gaan prentjies op hierdie bal wees van dinge wat uniek is aan die drie gasheerlande. Vir Meksiko sal daar 'n arend wees en vir Kanada die esdoringblaar (maple leaf). Vir die VSA is dit 'n ster, soos wat daar op hulle landsvlag is.

12   Die FIFA Wêreldbeker-sokkertoernooi van 2026 gaan 'n groot sokkerfees wees! Wie gaan wen? Brasilië het al vyf keer gewen. Gaan dit weer hulle wees? Of dalk Spanje, wat nog net een keer gewen het? Gaan Messi sy derde Goue Bal-toekenning ontvang? Gaan Mbappé wéér die Goue Stewel ontvang? Net die tyd sal leer.

[Verwerk uit Wikipedia, Brittanica, e.a.]

Party mense hou nie van vrugte nie. Tog is die vrugte wat jy eet, op baie maniere goed vir jou. Die water in vrugte kan help wanneer jy dors is.

Moenie gemorskos eet wanneer jy honger word terwyl jy besig is nie. Eet liewer vrugte — dit het baie vesel wat jou vol sal laat voel.

Daar is suur in 'n mens se mond wat plaak produseer. Eet appels! Dit sal help om jou tande te skrop.

Genoeg slaap is belangrik. Indien jy sukkel om te slaap, kan jy 'n kiwivrug eet — dit help jou om beter te slaap.

Stres kan jou in 'n slegte bui laat. Die reuk van lemoene kan jou help om te kalmeer.

Soms sweet jy en ruik nie lekker nie. Deur suurlemoen aan jou lyf te smeer, sal jy lekker ruik.

Jy moet jou vel oppas. Aarbeie is propvol antioksidante en hou jou vel gesond.

MEER AS NET ...

1   Is hy platsak en verplig om by 'n slaghuis te gaan raap en skraap? Aikona, die akteur Alfred Ntombela, oftewel Shorty, floreer en ryg die geleenthede as bemarker en akteur in.

2   Daar staan die kort man netjies in die video met 'n glimlag en 'n hoed op sy kop. Hy help kliënte om vleis in hulle trollies en mandjies te pak. Sodra die tevrede kliënt met sy inkopiesakkie by die deur van die slaghuis uitloop, hoor jy daai bekende laggie.

3   Die man is niemand anders as die akteur Alfred Ntombela, Shorty van Leon Schuster se flieks nie. En dié video en ander van hom waar hy in 'n slaghuis werk, het die afgelope tyd miljoene mense se aandag getrek.

4   Mense wonder oor wat van Shorty geword het. Het sy loopbaan in die vermaakbedryf dan nou so platgeval dat hy in 'n slaghuis moet werk om die pot aan die kook te hou?

5   As daar een mens is wat niks beïndruk was met dié skinderstories nie, was dit Shorty. "Verkeerde afleidings is gemaak," sê Alfred (53).

6   "Mense dink ek is op my laaste, maar die teenoorgestelde is die waarheid. Ek is g'n platsak nie, ek floreer," sê hy. Hy werk net deesdae as ambassadeur vir die slagter in die video, verduidelik hy. "Ek help hulle met bemarking." Die bespiegeling oor Shorty se lot het hulle laat besluit om dit vir bemarking te gebruik. Ten minste praat almal nou oor die slaghuis en dis mos wat hulle wou hê.

7   "Ek maak 'n grappie met die grootbase en sê ek dink dis tyd dat ek my eie slaghuis moet hê. Dink net hoe baie voete sal ek lok." Hy kraai van die lag. "My lag is my roeping, maar dis net een deel van my." Sy vriendskap met Leon sal ook altyd sterk wees, maar die tyd het aangebreek om ook ander geleenthede aan te gryp.

8   Sy aandag is kort-kort by sy foon toe ons gesels, by 'n spa in Randburg, waar hy 'n handelsnaam ambassadeur is. Terwyl Alfred saam met ons kuier, laat staan hy sy foon eenkant en stroom hy sy woorde regstreeks vir sy volgelinge op TikTok.

9   Alfred vat ons terug na toe hy 'n jong seun vanaf van die Oos-Rand was. "Jô, ek was stout," sê hy en lag. "Ek was mal daaroor om mense te terg en skoor te soek. In die aande sou ek snaakse spookgeluide maak wat mense die skrik op die lyf gejaag het. Sommiges het gedink dis 'n spook wat hulle teister. Dit was alles onskuldige pret."

10   Hy het in sy jong dae al geweet 'n lewe as akteur was vir hom bestem. In 1990 toe hy 18 jaar oud was, het hy sy groot kans gekry in Leon se rolprent, Oh Shucks ... ! Aanvanklik was Leon huiwerig oor die rolverdeling. Eers toe hy Alfred se spontane lag op 'n oudisie hoor, het die grapkoning geweet hy het die regte man vir die rol gevind.

11   "Leon is 'n pa-figuur vir my," sê Alfred. "Ons is kollegas en vriende en ons sal altyd 'n sterk band hê. Ek's dankbaar vir die deure wat hy vir my in my loopbaan oopgemaak het." Hy's ook nie net 'n komediant nie. Verlede jaar het hy die hare op kykers se koppe orent laat staan toe hy die gewetenlose misdaadbaas Hush Puppy in die Netflix-dramareeks Mabaso Family Reunion: The Funeral gespeel het.

12   "Ek glo ek kan enige rol speel. Komedie, drama, aksie." Hy het sy goue jare betree en dit sterk oorweeg om as akteur af te tree. "Dit was 'n moeilike tyd. Die rolle en geleenthede het nie gekom nie. Vanweë my konneksie met Shorty het ander produksiemaatskappye nie na my gekyk nie, hulle het gedink komedie was al wat ek kon doen. Maar daar steek meer in my." Asgar Mahomed het Alfred gehelp om meer rolle en geleenthede in te katrol, in die korporatiewe en bemarkingswêreld.

13   Wanneer hy nie voor die kameras is of sy aanhangers op sosiale media vermaak nie, is hy 'n gesinsman. "Ek dink nie jy moet my meer Shorty of Alfred noem nie. Eerder Oom Alfred of nog beter Oupa Alfred," terg hy. Om 'n oupa vir sy twee kleinkinders te wees, gee hom ook baie sin in die lewe. "Daar is niks so belangrik in die lewe soos familie nie," sê Alfred. "Ek het geleer jy moet jou gesin koester!"

14   Daar is nog baie energie en woema in Alfred, dus kyk hy ons snaaks aan toe ons hom vra hoe hy eendag onthou wil word. Maar Alfred bevestig hy wil graag vir sy lag onthou word en hoe hy vreugde, vermaak en troos vir ander gebring het. Maar bo alles wil hy onthou word vir hoe hy mense laat lag het.

[Verwerk uit Huisgenoot op 31 Julie 2025]

WAT KAN ONS IN 2027 VERWAG?

1   Die jaar 2027 gaan 'n belangrike jaar wees vol baie interessante dinge wat regoor die wêreld gaan gebeur. Hierdie gebeure sal mense se lewens raak op die gebied van sport, tegnologie, die omgewing en ruimteverkenning.

2   Een van die grootste sportgebeurtenisse sal die 2027 Rugby Wêreldbekertoernooi wees wat in Australië gaan plaasvind. Baie lande sal deelneem en miljoene mense sal regoor die wêreld — in stadions en op televisie — na hierdie wedstryde kyk. Vir rugbyliefhebbers sal dit 'n baie opwindende tyd wees, omdat die beste spanne in die wêreld teen mekaar sal speel.

3   Nog 'n groot sportgebeurtenis is die "FIFA Women's World Cup 2027" wat in Brasilië aangebied sal word. Hierdie toernooi sal baie aandag kry en beslis help om vrouesport nog meer gewild te maak. Jong meisies, wêreldwyd, sal geïnspireer word om self aan sport deel te neem en ook hul drome te volg.

4   Op die gebied van tegnologie word daar verwag dat rekenaars en kunsmatige intelligensie nog slimmer gaan word. Mense sal waarskynlik al hoe meer slimtoestelle in hul huise gebruik, soos masjiene en robotte, wat na jou stem sal kan luister en dan opdragte uitvoer. Dit sal help met daaglikse take. In skole sal leerders meer met digitale hulpmiddels werk, wat leer makliker en vinniger sal maak.

5   In 2027 sal daar ook baie aandag aan die omgewing gegee word. Baie lande probeer reeds om minder besoedeling te veroorsaak en meer skoon energie te gebruik. Teen 2027 sal daar moontlik baie meer sonpanele en windplase wees. Mense sal ook aangemoedig word om meer te herwin, water te bespaar en minder plastiek te gebruik.

6   Ook wat ruimteverkenning betref gaan daar heelwat ontwikkeling wees. Organisasies soos NASA beplan nuwe reise na die maan. Wetenskaplikes hoop om meer oor die ruimte te leer om só voor te berei vir moontlike reise na Mars. Hierdie reise gaan ook help om nuwe tegnologie te ontwikkel wat ook op die aarde gebruik sal kan word.

7   Politiek en die ekonomie sal ook 'n groot rol in 2027 speel. Lande sal verkiesings hou en nuwe leiers sal groot besluite neem oor werk, veiligheid en handel. Hierdie besluite kan die wêreld se ekonomie beïnvloed en mense se lewens verander.

8   Daar word ook verwag dat mediese tegnologie teen 2027 sal nog beter sal word. Dokters sal nuwe masjiene en behandelings gebruik om siektes vinniger op te spoor en beter te behandel. Dit sal help dat mense langer en gesonder kan leef.

9   Mense wat in 2027 goed sal presteer, is dié wat maklik kan aanpas by vinnige verandering en kreatief kan dink. Jong professionele persone wat digitale vaardighede kan kombineer met empatie en kommunikasie, sal waardevol wees in verskillende beroepe.

10   Entrepreneurs wat oplossings vir gemeenskapsprobleme kan gee, veral in die landbou, gesondheid en onderwys, sal 'n groot impak maak. Verder sal mense wat emosioneel intelligent is, 'n voorsprong hê. Hulle het die vermoë om spanlede te motiveer, konflik te bestuur en kulturele diversiteit te respekteer.

11   Sportlui en kunstenaars wat hul talente wil ontwikkel, sal ook nuwe platforms vind om hul werk wêreldwyd te deel. In 'n tyd van ekonomiese en sosiale verandering sal mense wat 'n goeie balans tussen werk en hulle persoonlike lewe kan ontwikkel, baie goed vaar. Mense wat 'n positiewe bydrae in hul gemeenskappe lewer sal as ware rolmodelle uitstaan.

12   2027 sal behoort aan mense wat nie net tegnies vaardig is nie, maar ook menslik, kreatief en veerkragtig — hulle sal die toekoms bepaal en ander inspireer om dieselfde te doen.

13   Ten slotte. 2027 sal dus 'n jaar vol verandering en nuwe ontwikkelings wees. Sport sal mense saambring, tegnologie sal vinnig verbeter, en daar sal meer pogings wees om die aarde te beskerm. Dit sal dus 'n belangrike jaar wees om die toekoms van die wêreld te vorm.

[Verwerk uit: meta saamgestelde artikel]